Wawaran Jeung Iklan Layanan Masyarakat

Wawaran nyaeta tulisan anu eusina mangrupakeun kalimah panitah, panyaram atawa pangajak, saperti panitah pikeun kudu nutup panto lamun kaluar, panyaram ulah miceun runtah atawa pangajak pikeun ngajaga kaberesihan di hiji tempat. Wawaran biasana dipasang di tempat umum anu aya hubunganana jeung eusi eta wawaran, saperti di dingding masjid, sakola, bandara, mall, jeung sajabana. Wawaran biasana ngan saukur mangrupakeun tulisan anu ukuranana relatif leutik. Conto kalimah nu aya dina wawaran :

1. Lamun ka luar ulah poho nutup panto !

2. Ulah miceun runtah di dieu !.

3. Hayu urang jaga kaberesihan tempat ieu !.

Sedengkeun iklan layanan masarakat nyaeta tulisan anu umumna ngabogaan eusi kalimah pangajak, saperti umpamana pangajak pikeun mayar pajak, pangajak pikeun ngaberantas narkoba, atawa pangajak pikeun jadi donor darah jeung biasana deui lolobana program pamarentah. Iklan layanan masarakat biasana dipasang di tempat anu strategis jeung gampang kabaca, tapi henteu kudu dipasang di tempat anu aya hubunganana jeung eusi eta iklan layanan masarakat. Iklan layanan masarakat biasana henteu ngan saukur tulisan wungkul, tapi oge dilengkapan ku gambar atawa latar anu menarik. Iklan layanan masarakat biasana ngabogaan ukuran anu relatif gede ti batan wawaran, saperti mangrupa poster atawa spanduk. Conto kalimah iklan layanan masarakat anu biasana ditulis dina poster atawa dina spanduk :

1. Hayu urang mayar pajak pikeun kamakmuran urang sarerea !

2. Narkoba teh musuh urang sarerea, kusabab kitu ulah sok wani ngadeukeutan !

3. Hayu urang jadi donor darah, pekeun ngabantu dulur urang sarerea !